Petronorrek ostegun honetan amaitu du bere unitateak martxan jartzeko fasea, Muskizko findegiko Bihurketa Geralekuko lanen ostean. 47 milioi euro inbertitu dituzte, eta azken bi hilabeteetan ekoizpen-instalazioen mantentze sakona eta eguneratzea egin da, bi helbururu nagusirekin: segurtasuna eta eraginkortasuna hobetzea eta emisioak murrizteko berrikuntzak txertatzen jarraitzea.
Petronorrek nabarmendu duenez, prozesua "konplexua" izan da, eta 45 enpresatako 1.200 langilek baino gehiagok hartu dute parte. Guztira, 325.000 lan ordu baino gehiago behar izan dituzte, eta horietan, besteak beste, galdaragileek, tuberoek, soldatzaileek, aldamioek, kalorifugatzaileek, mekanikariek, argiketariek eta instrumentistek parte hartu dute.
Geldialdiaren hasieran adierazi zen bezala, aste hauetan ekipoak ireki, garbitu, berrikusi eta berregokitu dituzte, hurrengo ziklo operatiboari begira funtzionamendu baldintza ezin hobeak bermatzeko. Gainera, konplexutasun tekniko handiko mantentze-lanak egin dituzte, industria-sektoreko teknologiarik berritzaileenak eta eraginkorrenak erabiliz. 13 unitateetatik 300 ekipo baino gehiagotan jardun da: zutabeak, deposituak, labeak eta tximiniak ikuskatu eta eguneratu dira, esaterako, hurrengo ziklo operatiborako funtzionamendu-baldintza egokiak ziurtatzeko.
Muskizko findegiaren esanetan, "egindako lan guztiak segurtasun-estandar zorrotzenei jarraituz egin dira", langile bakoitzarentzako prestakuntza espezifikoarekin.