Donald Trumpek iragarri dituen muga-zerga berriak ezagutu ostean, Imanol Pradales lehendakariak agerraldia egin du gaur goizean kazetarien aurrean. AEBra inportatutako produktu guztiei %10eko muga-zerga ezartzea erabaki du Trumpek. Aitzitik, Europako Batasunaren kasuan muga-zerga %20koa izango da, Txinarentzat, aldiz, %34koa.
Dagoeneko dardarka zen lurrikara komertzialak astindu handiagoa eman dio munduari, eta nazioarteko agintariek lehen balorazioa egin eta lehen neurriak hartzen hasi dira. Ursula von der Leyen Europako Batzordeko presidenteak goizean goiz hitz egin du. Pedro Sanchez Espainiako presidenteak ere agerraldia egiteko asmoa du.
“Oso berri txarra da munduko ekonomiarentzat, atzerapauso bat”, adierazi du Pradalesek. Azaldu du Europak “irmoki, inteligentziaz eta proportzioz” erantzun behar diola AEBk bultzatutako merkataritza gerrari, eta behar diren neurri guztiak hartzeko prest dagoela gaineratu du. Trumpen muga-zergek 400 milioi euroko kaltea eragingo die AEBetara egiten diren esportazioei, lehendakariaren arabera. Hala, Industriaren Defentsarako taldea urgentziaz bilduko dela ere argitu du.
Estatu Batuak EAEko laugarren merkatua da esportazioei dagokienez. Iaz 2.000 milioi euro esportatu ziren herrialdera. Hori dela eta, lehendakaria kezkatuta azaldu da agerraldian. “Gure ekonomia, gure enpresak eta gure enplegua babesteko erantzun behar dugu”, nabarmendu du. Horretarako, Europaren “erantzun bat eta bakarra” eskatu du, kontinentearen batasuna azpimarratuz. "Merkataritza gerrak eta protekzionismoak pobretzea baino ez du erakarriko", gehitu du.
Era berean, Estatu Batuetan diharduten hemengo enpresekin hitz egingo duela jakinarazi du lehendakariak. Trumpen erabakiak industria sektorea kaltetuko du gehien, makina-erreminta, automozioa eta nekazaritza produktuak ekoizten dituzten enpresak batik bat, izan ere, esportzaileak dira enpresa horiek, eta AEB da euren merkatu garrantzitsuenetakoa. Sektore horiei zenbait laguntza eskaintzea aztertzen ari da Jaurlaritza.