Sandra Montes Perez ScrapAd enpresaren sortzailea eta Mari Jose Aranguren Querejeta Orkestra - Lehiakortasunerako Euskal Institutuko zuzendaria sarituko ditu Aspegi Gipuzkoako emakume enpresari, profesional eta zuzendarien elkarteak. Montesek enpresaburu kategorian jasoko du saria eta Arangurenek zuzendaritza / profesional kategorian.
Elkarteak “enpresa kudeaketan duten lidergoagatik, ahaleginagatik eta ezagutzagatik nabarmentzen diren emakume horien ibilbide profesional aparta ikusarazteko eta aitortzeko” asmoz antolatu du aurtengo sariketa, 10 urte marka eginez lelopean.
Montes Industria Ingeniaritzan eta Enpresen Administrazioa eta Zuzendaritzan lizentziaduna da. 2020an sortu zuen ScrapAd start-up-a Samuel Ruiz de Lorenzorekin batera. Birziklagarriak diren materialak salerosteko plataforma teknologiko bat da ScrapAd, zeinak hondakinen berrerabilera sustatzen duen. 30 langile ditu enpresak egun eta 125 herrialdeetako 3.000 erabiltzaile inguruk osatzen dute enpresaren sarea.
Aranguren, aldiz, Orkestrako zuzendaria da 2014az geroztik. Deustuko Unibertsitatean hainbat ardura kargu izan ditu eta 2015etik Ekonomiako katedraduna da. Orkestrak 3,3 milioi euroko diru-sarrerak ditu egun, 41 proiektu gauzatu ditu 98 erakunderekin lankidetzan eta 43 pertsonako lantaldea du.
Sari banaketa otsailaren 20an egingo dute, Donostian, Miramongo teknologia parkean.