EAEk eta Txinako Jinan hiriak hitzarmena sinatu dute, automobilgintzarekin, energiarekin eta manufaktura aurreratuarekin lotutakoa. Akordio berriari esker, bi lurraldeek sektore horiei buruzko ezagutzak, esperientziak, datuak, ekimen politikoak eta I+G arloa partekatzeko aukera izango dute.
Izan ere, Eusko Jaurlaritzak adierazi duenez, Txinako hiria “funtsezkoa” da ibilgailu komertzialen eta astunen produkzioan. Zehazki, manufakturari dagokionez, Jinanek %30eko gorakada izan du “komunikazioko eta elektronikako ekipamenduen, eta eraikuntzarako zein prozesu metalurgikoetarako makina astunen fabrikazioan”. Gainera, hiriko energia-azpiegiturak hobetzen ari dira, eraginkortasuna eta jasangarritasuna sustatzeko helburuarekin. Bestalde, hidrogeno berdean inbertsioa bikoizteaz gain, sare adimendunak erabiltzen ari dira energia berriztagarrietako proiektuak garatzeko.
Hala, Memorandum of Understanding (EUM) izeneko hitzarmena sinatu dute: alde batetik, Eusko Jaurlaritzako Industriako sailburuorde Andoitz Kortak; bestetik, Jinan hiriko Udal Herri Gobernuko alkateorde Xie Kunek. Akordioa Euskadiko Parke Teknologikoaren Gipuzkoako Campusean gauzatu da.
Bi lurraldeak elkar ezagutzen ziren, ordea, hitzarmena sinatu baino lehen. Hain zuzen ere, 2018. urtean Txinako zenbait agintarik bisita egin zuten EAEra, enpresa eta erakundeak ezagutzeko; Spri Taldeko ordezkariak ere gerturatu ziren Txinako hirira; azkenik, gaur sinatutako Elkar Ulertzeko Memoranduma negoziatzeko berriro ere bertaratu ziren txinatar ordezkariak.