World Maritime Week azokaren bosgarren edizioa aurkeztu da gaur. Itsas industriari buruzko ekitaldia martxoaren 19tik 21era bitartean antolatu da, Bilbao Exhibition Centren (BEC). “Erreferentziazko hitzordua” da zenbait sektorerentzat: arrantza, portuak, itsasoko energia berriztagarriak…
Azoka BECk antolatzen du, Eusko Jaurlaritzarekin, Spri Taldearekin eta Bizkaiko Foru Aldundiarekin lankidetzan, baita Energia Klusterrarekin, Euskal Itsas Foroarekin eta Uniport Bilbaorekin ere. Guztiek elkarlanean egitarau zabala aurkeztu dute: kongresuak, erakusketak eta networkinga egingo dira.
Hitzaldiei dagokienez, lau kongresutan banatu dituzte: industriari buruzko Keynote kongresua, arrantza-sektorearentzako EuroFishing kongresua, ontzigintzarentzako SInaval eta portuen sektorearentzako FuturePort. Bertan arituko dira 70 aditu baino gehiago, zeinak “enpresetako goi mailako profesionalak” izango diren, bai estatu mailakoak, baita nazioarteko mailakoak ere.
Bestetik, erakusketetan 53 enpresen produktu eta zerbitzuak aurkeztuko dira, eta bertan izango dira “industriako erreferente handiak”, adibidez: Astilleros Armon (Asturias), Bergen Engines (Norvegia), Cintranaval (Euskadi), Rings Around The World (AEB) edota Palfinger Marine (Madril), beste askoren artean. Erakusketen gunean aurkezpena “arinak” ere eskainiko dira, enpresa erakusketarien eta babesleen eskutik.
Azkenik, networkingerako Hosted Buyers’ Programme ere iragarri dute, non enpresa erakusketarien eskariak jasotzen eta B2B bilerak egingo diren. WMW Awards sarien bigarren edizioa ere ezagutarazi dute, eta, azaldu dutenez, aitortza berezia egingo diote enpresa baten ibilbideari.
WORKinn espazio berria
Aurten, lehen aldiz, networkingerako WORKinn For WMW proiektua egingo da. Bertan, itsas industriako enpresek eta erakundeek elkartzeko aukera izango dute, eta interesa dutenek aukera izango dute nabigazioko eta soldadurako simulagailu birtualak erabiltzeko. Lan-eskaintzak eskuratzeko gunea ere izango da, eta, gainera, hezkuntza programei buruzko informazio zein aholkularitza eskainiko da.