Euskararen presentzia enpresetan gero eta nabarmenagoa da. Horretan aritzen diren enpresak areagotzen ari dira. Alberdi Mekanizatuak da horren adibidea. 1958an Azkoitian Gipuzkoan sortutako familia-enpresa bat da, mekanizazio eta dekoletaje arloan 60 urtetik gorako esperientzia duena. Gaur egun, 3.000m²-ko instalazioetan lan egiten dute, 2017an inauguratuak, bezeroei kalitatezko soluzioak eskainita.
Pieza mota guztien mekanizazioan eta dekoletajean adituak dira, material askotarikoekin lan eginda, hala nola altzairuarekin, plastikoarekin, herdoilgaitzarekin, brontzearekin, eta abarrekin. “Gure zerbitzuak prozesu osoa hartzen du barne, mekanizaziotik hasi eta azken produktua entregatu eta stockaren kudeaketaraino. Muntaketa lanak ere bai”, esan du Aitzol Alberdik, Alberdi Mekanizatuen koordinatzaile orokorrak.
Enpresaren misioa 60 urteko esperientziak oinarritutako mekanizazio zerbitzu osoa eskaintzea da, inguruko gizartearekin arduraz jokatuz, pertsonak eta euskara haien lanaren ardatza izanik.
Sektore ugarirekin lan egitera ohituta daude: siderurgia, makina-erreminta... Oil&Gasen ere eskatzen diren material anitzetan adituak dira, hala nola titanioak edo duplexak, baita sektore eolikoan erabiltzen diren brida, tapak eta beste pieza batzuetan ere. “Sektore hidraulikoan, energian, eraikuntzan, mota guztietako makinetan eta instalazio berezietan gaude; adibidez, elikagaien sektorean”, jakinarazi du Alberdik.
Enpresaren misioa 60 urteko esperientziak oinarritutako mekanizazio zerbitzu osoa eskaintzea da, inguruko gizartearekin arduraz jokatuz, pertsonak eta euskara haien lanaren ardatza izanik. Alberdiren arabera, ikuspegia Urola bailarako mekanizazio arloan erreferente izatea da.
Euskara ardatz
Euskara betidanik egon da enpresan, baina azken bizpahiru urteetan bestelako pausoak ematea erabaki dute. “Ahoz eta naturalki egiten genituen gauzak estandarizatuta eta formalizatuta dena lotu genuen, eta BIKAINera aurkeztu ginen emaitzak ikusteko asmoz, alegia, denon lana saritu eta errekonozitzeko asmoz”, azaldu du Alberdik.
Gauzak horrela, orain dela gutxi Indeus Industriaren Euskal Plataforman parte izatea erabaki zuten. Alberdiren esanetan, erabakia hartu zuten iaz BIKAIN urrezkoa lortu zutenean aipatu zietelako: alde batetik, haien aletxoa eman nahi zuten, eta, bestetik, elkartearen babesa eta laguntza jasotzea interesgarria iruditu zitzaien hobekuntzak egiteko. “Gainera, Indeusen parte izateak harrotasuna sorrarazten digu”, gehitu du Alberdik. Izan ere, euskara enpresaren sorreratik egon da presente, modu naturalean. Egun langile bakarra dago euskalduna ez dena, eta hura euskalduntzen laguntzen ari dira, harekin ere ikasita. “Hiztegi bat emanez (etxean egindakoa), eta AEKko ikastaroen eta informazioa ekarriz laguntzen ari gara. Erronka enpresa %100 euskalduna izaten jarraitzea da”, esan du Alberdik.
Egun langile bakarra dago euskalduna ez dena, eta hura euskalduntzen laguntzen ari dira, harekin ere ikasita. “Hiztegi bat emanez (etxean egindakoa), eta AEKko ikastaroen eta informazioa ekarriz laguntzen ari gara. Erronka enpresa %100 euskalduna izaten jarraitzea da”
Halaber, Alberdi Mekanizatuen misioaren parte da gizartearekin arduraz jokatzea, pertsonak eta euskara haien lanaren ardatz izanik. Horregatik, eguneroko jardunean presente dago. Esan bezala, erronka nagusia da euskara enpresaren ardatz izaten jarraitzea, eta horretarako, erronkari aurre egiteko baliabideak eskaintzen eta lagunak topatzen saiatzen jarraituko dute.
Epe laburrean, bezeroekin duten harremana sendotzea, eta sektore berrietan sartzea dute xede. Epe luzera, aldiz, teknologia berrietan aurrera egitea, eta haien taldea haztea.
Finantzatu nondik?
Ibilbidean zehar, instalazio eta teknologia berrietan inbertitu dute, eta 2020an Mecanizados Gurrutxaga erosi zuten, haien hazkundea eta etengabeko hobekuntza bermatzeko. Laguntza ekonomikoak Iraurgi Berritzen bailarako garapen agentziaren lanari esker lortzen dituzte. Baina baita beste bide batzuetatik ere; hala nola SPRIko programak, Euskararekiko Lanhitz programa eta Azkoitiko Udalak euskara planak garatzeko ematen dituenak.
Finantziazioari dagokionez, finantziazio arrunta erabiltzen dute, hau da, haiek sortutako etekinak inbertituz eta bankuetako maileguak erabiliz. “Normalean horrela finantzatzen ditugu gure proiektuak eta enpresa, baita Elkargiren bidez ere”, esan du Alberdik.
Ziurgabetasunean gelditzerik ez
Sektorea etengabeko aldaketan dago, teknologia berrien integrazioa eta merkatu globalizatuaren eskakizunak direla eta. “Gure filosofia da bezeroei arreta pertsonalizatua eskaintzea, sektorean nabarmentzen gaituen ezaugarria baita hori”, adierazi du Alberdik.
Baina lan merkatuari dagokionez, Alberdiren arabera, zalantza asko dago inguruan. Momentuz lana badaukate, baina merkatuan gertatzen ari diren gauza guztiek eragina dute haien bezero guztietan, mundu mailan ari baitira lanean eta sektore ugaritan.
Epe laburrean, bezeroekin duten harremana sendotzea, eta sektore berrietan sartzea dute xede. Epe luzera, aldiz, teknologia berrietan aurrera egitea, eta haien taldea haztea
Izan ere, asko mugitzen den enpresa bat da, eta komertzialki hainbat egoten jarraitu nahi dute. Gainera, inguruko eragileekin oso harreman estua dute —ILH edo IMH formazio zentroak, Iraurgi Berritzen garapen agentzia, AEK...— , eta horri eustea ere da asmoa.