Bridgestonek Basaurin (Bizkaia) duen lantegian lan erregulazio espedientea abiaraziko duela jakinarazi du gaur. 831 beharginek egiten dute lan bertan, eta horietatik 335 bota nahi ditu. Enpresak ohar bidez azaldu duenez, pneumatikoen Europako merkatuak bizi dituen "aldaketa sakonak" direla eta, konpainiaren "ekoizpen egitura egokitu" beharrean aurkitzen da.
Basauriko fabrikako langileez gain, Kantabrian (Espainia), Puente San Miguel udalerrian duen beste lantegi bateko langileei ere jakinarazi die lan erregulazio espedientea martxan jarriko duela. Bertan 418 langilek egiten dute lan ,eta 211ri eragingo lieke erabakiak. Beraz, orotara, 546 behargin kaleratu nahi ditu Japoniako multinazionalak.
Nekazaritzan nahiz kamioi eta autobusetan erabiltzen diren pneumatikoen azpisektoreak nabarmen behera egin duela dio Bridgestonek, eta horren arrazoi jo ditu inflazioa eta araudi aldaketak. Era berean, Europatik at datorren lehiakideek merkatu kuota irabazi dutela argitu du.
Multinazionalak elkarrizketarako “konpromisoa” azaldu du, “irekia eta gardena” izango dena, eta adierazi du erabat jakitun direla egoera honek langileengan izan dezakeen inpaktuaz. Bere aburuz, prozesua "ahalik eta modu arduratsuenean eta errespetuzkoenean" ari da gauzatzen, "langileen ordezkariekin lankidetzan, eta bere erantzukizun sozialaren balioekin bat etorriz".
Asier Iragorri Basauriko alkateak kezka adierazi du, eta "elkartasuna eta babesa" eman nahi izan die langileei. Gogoratu du udaletxea langileei laguntzeko prest dagoela eta harremanetan dela enpresaren zuzendaritzarekin.
Langileek, bestalde, mobilizazioak iragarri dituzte, eta salatu dute euren aurkako eraso baten aurrean daudela. "Kolpe latza" izan dela aitortu dute, eta enpresak etorkizunerako planik ez diela aurkeztu nabarmendu dute.