Hirugarren greba eguna da gaur Basauriko Bridgestoneko langileentzat. Ekoizpena gelditu egin da, enpresak iragarritako kaleratzeen aurka egin baitute langileek. Izan ere, lantaldearen %40 kaleratzeko asmoa dute, hau da, 335 langile (Basauriko lantegikoak). Usansoloko lantegiko kideek ere bat egin dute greba egunarekin.
Gainera, sindikatuak (CCOO, UGT, ELA, BUB eta STIB) biltzen hasi dira jada datorren egunetarako mobilizazio egutegia adosteko helburuarekin; apirilaren 25ean aurkeztuko diete langileei egutegi hori. Egun horretan ere greba egiteko asmoa dute langileek.
Orain arte “erabateko” parte hartzea izan dela esan du langileen batzordeak, eta gaineratu duenez beharginek “borrokan eta mobilizatzen” jarraitu nahi dute. Zuzendaritzak konpromisorik ez duela azaldu du, eta, horrez gain, salatu du kaleratzeak ez direla oraindik justifikatuak izan. Apirilaren 24an bilduko da berriro ere batzordea zuzendaritzarekin.
