Elsa Castillo izango da Kaiku kooperatibaren lehendakari berria. Abeltzaina da Castillo, eta Azkoienen (Nafarroa) duen familia ustiategia kudeatzen aritu da azken urteotan. Baserrian lanean ari den familiaren laugarren belaunaldiko kidea da.
Esneki enpresaren lehen emakumezko presidentea izango da Castillo. “Orain dela urte batzuk arte, emakumeak abeltzaintzan zuen zeregina laguntzekoa izaten zen; zalantzarik gabe, hori lan handia da, baina ikuspen gutxikoa. Gaur egun, gero eta ohikoagoa da baserria emakumeek zuzentzea, haiek izatea ageriko aurpegia, eta horretan aurrera egiten jarraitu behar dugu, ikusgarritasuna eta aintzatespena lortzeko. Gaur egun, Kaiku kooperatiban zuzendaritza-postuen %50 emakumeek betetzen dituzte”, jakinarazi du Castillok.
Kaiku kooperatibak 300 ustiategi baino gehiago ditu Hego Euskal Herrian, eta 800 bat langile aritzen dira esnea biltzen, eraldatzen, biltegiratzen eta garraiatzen. Urtean 227 milioi litroko bolumena kudeatzen dute egun, zonaldean biltzen den esne guztiaren %78 hain zuzen.
Sektorearen erronka nagusietako bat belaunaldien arteko erreleborik eza da, eta, horren ondorioz, datozen urteetan ganadutegi ugari itxiko direla aurreikusten da. “Behar bezala balioetsi behar dira bai abeltzain izateak eskatzen duen ahalegina eta sakrifizioa, eta bai landa-inguruneari egiten diogun ekarpena. Belaunaldiz belaunaldi iraun duen lanbide honi eutsi nahi badiogu, gizarteari jakinarazi behar diogu etorkizunera begira kalitatezko eta hurbileko produktu baten alde egin behar dela, eta, batez ere, atzean proiektu sendo eta jasangarri bat duen produktu baten alde”, aldarrikatu du presidente berriak.