Gipuzkoako Foru Aldundiak enpresentzako laguntza katalogo berria aurkeztu du gaur goizean. 31 milioi euroko aurrekontua izango du eta 39 programa biltzen ditu. Aldundiak azaldu duenez, helburua da lurraldeko enpresa sarea indartzea eta enpresen sorkuntza, hazkundea eta proiekzioa bultzatzea.
Gipuzkoako teknologia parkean egin dute katalogoaren aurkezpena, baina beste bi aurkezpen egiteko asmoa iragarri du aldundiak. Bat gaur arratsaldean egingo da Ordizian, Goieki garapen agentziaren egoitza, bestea Arrasaten egingo da, Garaia teknologia parkean, datorren astelehenean.
Zazpi kategoriatan banatu dira katalogoko laguntzak: Ekintzailetza (1.976.000€), Berrikuntza (7.990.000€), Digitalizazioa eta 4.0 Industria (2.420.000€), Lehiakortasuna (7.452.166€), Sustapen ekonomikoa (2.366.600€), Jasangarritasuna (1.500.000€) eta Pertsonak eta talentua (7.342.000€).
Unai Andueza Ekonomia Sustapeneko eta Proiektu Estrategikoetako diputatuak nabarmendu duenez, programaren helburu nagusia ahalik eta enpresa gehienetara iristea da. “Zuzeneko laguntzez gain, Gipuzkoako ekosistema sendoa dela nabarmendu nahi dugu. Programa hau, lurraldeko ekosistema osatzen dugun eragile guztiekin lankidetzan diseinatu da: erakundeak, garapen agentziak, ikerketa zentroak eta elkarteak, besteak beste. Programa berritzailea da, eta gertutik jarraitzen ditu enpresen egungo eta etorkizuneko beharrak, entzun egiten ditu eta egokitu egiten da”, adierazi du.