Basque Circular Summit topaketa egiten ari dira egunotan Bilboko Euskalduna Jauregian eta Basque Circular Best sariak banatu dituzte bertan. Fagor Ederlan, Somos Oreka, Gamesa Gearbox eta Fuelium enpresak saritu dituzte, ekonomia zirkularrean egindako lanagatik.
Ihobe sozietate publikoak bultzatutako sariketa da, eta lehen edizioa izan da aurtengoa. Basque Circular Summit-en erakutsi diren 150 produktu eta zerbitzuetatik, 49 enpresek 65 hautagaitza aurkeztu dituzte.
“Sari hauek katalizatzaile bat dira enpresa gehiago jardunbide jasangarriak hartzera bultzatzeko, lurraldeko ekonomia eraldatu dezakeen efektu biderkatzaile bat sortuz”, adierazi du Alexander Boto Ihobeko zuzendari nagusiak.
Fagor Ederlanek produktu zirkularraren saria irabazi du, bere aluminiozko portamangeta produktuagatik. Ibilgailuaren segurtasunerako funtsezko osagaia da, hiru sistema bateratzen dituena: norabidea, moteltzea eta balaztaketa.
Zerbitzu zirkularraren saria Somos Orekarentzat izan da, elikagaien soberakinak berrerabiltzeko sortu dute plataformagatik, izan ere, horri esker lortu dute hilean 50 tona elikagai gutxiago xahutzea.
Negozio eredurako saria, aldiz, Gamesa Gearboxek erdietsi du. Aerosorgailuetako piezen birmanufakturan oinarritutako negozio-eredu berria garatu du konpainiak.
Azkenik, start-up zirkularraren kategorian, Fuelium izan da irabazlea. Paperezko bateriak ekoizten ditu Bizkaiko start-up bat da, zeinak erabilera bakarreko gailu eramangarrietan aplikatzeko ekodiseinatuta dauden, in vitro eta zaintza pertsonaleko diagnostikoetan, hala nola haurdunaldi-probak, odol- eta listu-analisiak, besteak beste.