Guardian Glassek gaur itzaliko du Laudion duen lantegiko labea. Multinazionaleko zuzendaritzak eman du itzaltzeko agindua, eta goizeko 8:00tan hasi dute prozesua. Eusko Jaurlaritzarekin bildu zen atzo enpresaren zuzendaritza, itxieraren nondik norakoak negoziatzeko asmoz. Lantegiko enpresako batzordeak salatu du, ordea, labearen itzaltzea Jaurlaritzarekin adosturiko baldintzak bete gabe burutzen ari dela.
Atzoko bileran adostu zuten Jaurlaritzako teknikari eta Osalaneko ikuskatzaileak izango zirela labearen itzaltze prozesuan, baina langile batzordeak gaur goizean jakinarazi du ez dagoela plantan Jaurlaritzaren ordezkaririk. Gerora, Jaurlaritzak baieztatu du Industria Saileko eta Osalaneko teknikariak fabrika barruan direla.
Mikel Torres industria sailburua bildu zen atzo Guardianeko zuzendaritzarekin, eta labea “modu kontrolatuan” itzaliko zutela argitu zuten. Segurtasun baldintza zorrotzak ezarriko zirela ziurtatu zuten, eta etorkizunean labea berriro martxan jartzeko moduan itzaltzea adostu.
Halaber, Ainize Gastaka Laudioko alkateak nabarmendu du labearen itzaltze kontrolatua eginez gero, azpiegitura kaltetu gabe, lantegia berriz irekitzeko interesa duen inbertitzaileren bat egon daitekeela.
Enpresa batzordeak deituta, 200 bat pertsona lantegiaren kanpoaldean batu dira protesta egiteko goizeko 6:00tan. Azaldu dute goizeko 4:00etatik Laudioko plantakoak ez diren hainbat langile sartu direla lantegira. Langileez gain, beste 300 bat lagun elkartu dira fabrika inguruan, eta goizeko 10:00ak arte izango dira protestan.