Innobasque Berrikuntzaren Euskal Agentziak presidente berria du: Imanol Rego. Hala erabaki dute aho batez Zuzendaritza Batzordeko kideek, gaur egindako ezohiko bilkuran. Manuel Salaverriaren lekukoa hartu du, hala, Regok, egungo Irizar Taldeko zuzendari nagusiak; Innobasqueko bosgarren presidentea izango da.
Salaverria pozik agertu da egindako ibilbidearekin, eta eskerrak eman dizkie Zuzendaritza Batzordeko kideei: “Berrikuntzaren euskal ekosistemak, eta, oro har, euskal gizarteak lan nekaezina egin dugu EAEko berrikuntzaren alde”, adierazi du. Aldi berean, Regori azaldu dio “erronka handia” duela aurrean, besteak beste, “trantsizio sakon eta erradikalak, eta munduko geoestrategia nahasia” direla eta. EAEk balio eta ahalmen handia dituela onartu arren, “ahulezia handiak dituen herrialdea” dela ere gehitu du.
Regok “ilusio handia” duela adierazi du, eta esan du “Inflexio puntuan” daudela. Zenbait faktorek arreta berezia eskatzen dutela gogorarazi du: berritxuratze geopolitikoak, deskarbonizazioak, trantsizio energetikoak, iraultza teknologikoak eta erronka soziodemografikoak.
Imanol Rego 2022az geroztik da Innobasqueko Zuzendaritza Batzordeko kide, hain zuzen, Irizar Taldeko zuzendari nagusi izendatu zutenetik. Ingeniari industriala da, eta batik bat, industriaren, teknologiaren, mugikortasunaren eta kanpo-merkatuaren alorretan lan egin izan du.
Bileran izan dira Mikel Jauregi Eusko Jaurlaritzako Industria, Trantsizio Energetiko eta Jasangarritasun sailburua eta Juan Ignacio Pérez Iglesias Zientzia, Unibertsitate eta Berrikuntza sailburua, baita Innobasqueko hiru presidente ohi ere: Perdo Luis Uriarte, Guillermo Ulacia eta Alberto García.