Hernaniko (Gipuzkoa) Sete enpresaren itxieraren ondorioz, langabe geratuko dira 65 enplegatu. Aluminiozko tutu txikiak ekoizten dituen konpainiako enpresa batzordeak adierazi du “gauzak beste era batera egin izan balira, enpresa eraginkorra izango litzatekeela", urte askoan “garrantzia izan duen enpresa” izan baita (ahalmena du urtean 110 milioi ontzi eta tutu ekoizteko). 1993an sortu zen, Pasai Antxon, baina 1996. urtean Hernanira lekualdatu zen.
Arazoa, ordea, duela urte batzuk hasi zen: 2016an. Garai hartan hasi ziren “gatazkak”, langileak ordainsaria jaso gabe geratzen hasi zirenean, “zuzendaritzaren kudeaketa txarrarekin” batera. Batzordeak azaldu zuenez, 2018. urtera arte enplegatuak “lanera joaten ziren soldata kobratuko zuten jakin gabe ala Geroa Pentsioak-i kotizazioak ordainduko zitzaizkion jakin gabe”.
2018an enpresa hartzekodunen konkurtso egoeran sartu zen, eta urtebete pasatu ondoren, alor bereko enpresa argentinarrak, Aluex izenekoak, erosi zuen Sete. Aluexek aluminiozko ontziak egiten ditu. Momentu hartan, esperantza izan zutela adierazi dute enpresakoek, konpainiak hobe funtzionatuko zuela pentsatu baitzuten egindako “milaka promesaren” ondorioz. Gauzak, ordea, antzera jarraitu zuten, eta antzera jarraitzen dute gaur egun. Salatu dutenez, “gezurrak, ordainketetan faltak, kudeaketa txarra eta langileen nominatik dirua kentzen ari dira, Geroari ordainketak egiteko, zeinak gero ez diren ordaintzen”.
Langileak zenbait eskaera egin dituzte urteetan zehar: inbertsioa makinerian, bideragarritasun planak, ekoizpen prozesurako hobekuntzak… Enpresak, ordea, ez die inolako erantzunik eman: “gure ahalegin guztiek enpresaren axolagabekeriaren aurka egin dute”, gaineratu dute.