Akordiorik gabe bukatu da Mutrikuko (Gipuzkoa) Conservas Zizzoko enplegua erregulatzeko espedientearen negoziazioa eta kalera joango dira enpresako hamazazpi langileak. ELAk jakinarazi duenez, kaleratzeak martxoaren 20an gauzatuko dira.
Sindikatuak salatu du "azken urteetako kudeaketa txarraren ondorioz”, enpresa aurre konkurtso egoeran sartu zela urtarrilean, eta lantalde osoari eragiten dion espedientea aurkeztu zuela ondoren. "Negoziaketek ez dute balio izan langileen lanpostuak eta lan baldintza bermatzeko, ezta kalteordain eta soldaten inguruan adostasuna lortzeko ere, akordiorik gabe bukatuz prozesua", esan du ELAk.
Sindikatuaren arabera, zor zaien kalte ordainen zati bat kobratu gabe geratuko dira langileak, eta Fogasa Soldatak Bermatzeko Funtsera jo beharko dute.
Arrain kontserben sektorean dihardu Zizzok, eta ELAk nabarmendu du ia langile guztiak emakumezkoak direla.