Bizkaiko arte grafikoen sektoreko negoziazioak blokeatuta jarraitzen dute, eta sindikatuek (ELA, LAB, CCOO eta UGT) Cebek patronalari eskatu diote egoerari irtenbidea emateko. Negoziazioen blokeoari amaiera emateko helburuarekin, sindikatuek bost eguneko greba iragarri dute, urriaren 29, 30 eta 31n, eta azaroaren 4 eta 5ean, eta ekoizpena geldiaraztea da asmoa.
Astelehen honetan, Cebeken egoitzaren aurrean bildu dira sindikatuak, Bilbon, “hitzarmen duin” baten alde egiteko. ELAk adierazi duenez, urriaren 15ean egindako azken negoziazio bileran, patronalak ez zuen inongo aurrerapausorik eman, eta gehitu dute soldata-eskakizunak ez daudela oraindik behar bezala negoziatuta.
Datozen greba egunetan, sindikatuek berretsi dute berriro ere ekoizpena geldiaraziko dutela, eta adierazi dute hurrengo negoziazio bileran (urriaren 24an) patronalak aukera izango duela egoerari amaiera emateko.
Azkenik, sindikatuek salatu dute Bizkaiko Arte Grafikoen sektorean greba-eskubidea etengabe urratzen ari dela, eta Etxebarriko Arteos Digital enpresaren aurkako lan ikuskaritzaren txostena jarri dute adibide gisa. Sindikatuek patronalari eta enpresei eskatu diete oinarrizko greba eskubide hori errespetatzeko.