Oñatiko Stadler enpresak aurrera egingo du bertan lan egiten duten 58 langileen kaleratzearekin. Izan ere, pasa den ostiralean amaitu zen enplegu erregulaziorako espedientea adosteko elkarrizketetarako epea, baina sindikatuek eta zuzendaritzak ez zuten akordiorik lortu.
Gauzak horrela, ELAk “zuzendaritzaren kudeaketa txarrari” egotzi dio enpresaren itxiera. Apirilean hasiko dira kaleratzeak, eta sindikatuak salatu du langileak Fogasa Soldatak Bermatzeko Funtsera jo beharko dutela, enpresak ez baitu dirurik kalte ordainketetarako; ondorioz, kaleratuak izateaz gain, “enplegatuek ez dute zor zaien kalte ordainaren zenbateko osoa jasoko”, gaineratu du ELAk.
Enplegu erregulazioko espedientea abiatu zenean, enpresako arduradunek argudiatu zuten itxiera salmenten beherakadaren ondorio zela, ezin baitzieten gastuei aurre egin. “Beste behin, ondorioak pairatzen dituztenak langileak dira”, erantzun zieten sindikatutik.