Ez dakit etorkizuna beltza den, baina ez da morea. Google bilatzailean “artificial intelligence to reduce gender gap” bilatuta, ez dut lehen bi orrietan adimen artifizialak sexuen (edo generoen) arteko desoreka murrizteko erabilerarik izan dezakeen erantzuten duen erreferentziarik. Agian ez dut galdera ondo egin. Googlek, ordea, “How can AI help in gender equality” —nola lagun dezake adimen artifizialak genero berdintasunean?— galdera gomendatu dit, baita erantzun bat proposatu ere.
Hain zuzen ere, PwC enpresaren webgunean diotenez “adimen artifiziala talentu-talde zabalagoetara iristeko erabil daiteke, erakarpen- eta kontratazio-ahaleginetan alborapena murrizteko eta talentua kudeatzeko sistemetan uneko alborapena eteteko aukera ere eman dezake”. Ados, erantzun txukuna da eta ez dut uste teknikoki inplementatzeko bereziki zaila izango denik. Gero, bilatzailearen orrian behera eginda, ezer ere ez. Orrian behera eginda adimen artifizialaren eragin kaltegarriei buruzko erreferentziak baino ez ditut aurkitu.
Egia da adimen artifizialak emakumeei eta beste edozein talde zapalduri mesede gutxi egin diola orain arte eta lan gehiena kalte hori nola gauzatzen den aztertzeko egin dela. Ziur nago, ordea, jende askok galdetu diola bere buruari adimen artifiziala nola erabil daitekeen emakumeen alde. Adimen artifiziala loro bat izanik, zer egin beharko genuke bere siliziozko psike horretan emakumeen aurkako diskurtsoak eta alborapenak ezabatzeko eta berdintasuna txertatzeko?
Kasu honetan ez da etorkizun beltz kontua, baizik eta iragan beltz kontua. Ereduek orain arte ikasi dutenean errotuta dago genero alborapena, eta ez da tumore isolatu bat bezala errotik kendu daitekeen zerbait; kafeari kolore beltza kentzea bezalakoa da aurrean dugun erronka. Izan ere, kafeari zenbat eta ur garden gehiago bota are argiagoa egiten da eta txikituz joaten da bere mingostasuna.
Martxoaren 8aren aitzakiagatik bada ere, nahiz eta apirilean olatu morea hamaika hilabeterako ahaztu, goazen gure inguruan emakumeen aurkako mezuak eta ekintzak ezabatzera eta genero-arrakala txikitzen saiatzera. Goazen loroari zein mezu eta ekintza errepikatu behar dituen irakastera.