Ileapaindegiko lehorgailuan jarrita irakurri dut “atzeraldiko ilehoria” nola egin. Aldizkarian azaltzen dute 2008ko atzeraldian murrizketek gogor erasan zutela, baita ere, ileapaindegiko gastua. Kaltetuenak, dio, ilehoriak izan ziren. Euskal Herriko adats ilehori zoragarriak eztia baino naturalago direla pentsatzen dutenentzat azalpena: metxa, aluminio paper, tinte, pazientzia eta diru asko behar da kalpar hori distiratsua eraman ahal izateko. “Atzeraldiko ilehoria” eramatea, aldiz, ilearen sustraiak ilunago eramatean datza, argitasuna puntetara eramaten da, eta horrela denbora tartea gehiago luzatu ahal da berriz metxak eta tinteak jarri arte. Ilearen sustraiak ilunago berdin ileapaindegira joanaldi gutxiago berdin gastu txikiagoa berdin atzeraldiari aurre egiteko diru gehiago sakelean.
Bada, itxura batean, eta beti ere modako aldizkariak dioenez, ekonomia atzeraldiaren atalasean egon gaitezkeen honetan, Tik Tokeko joera berrietako bat da “atzeraldi ilehoria” egitea, emakumeak gertu gerta daitekeen edozein ekonomia gorabeheratarako.
Kontua da aldizkariak orri gehiago dauzkala, eta orriak aurrera irakurtzen, Europako gizarte eta ekonomia eliteko-edo emakumeak ere agertzen direla bertan, horiek bai, ilehori luze benetan deigarri eta zoragarriekin. Ezagun da ilepaindegian d&d (denbora eta dirua) eman dutela. Emakume aberatsen irudiak jasotzen dituzten argazkietan ez da antzematen, preseski, “atzeraldi ilehoririk”. Kontrakoa: ilearen sustraiak eta puntak ondo antolatuta daude.
Eta irudien azpiko letra txikia irakurrita, gizarteko elitearen hizki txikerretan baitago informazio ekonomikoa, ikus dezaket aldizkariak berri ematen digula ilehori dotore horietako askok negozioak eta enpresak dituztela. Ilehorien eta beraien ingurukoen enpresa eta negozio gehienak, aldizkariaren arabera, inmobiliarioak dira. Hori da gehien-gehienetan errepikatzen den negozio-sektorea.
Alegia, Europako eta Espainiako elitearen aberastasunaren parte handi bat, modako aldizkariak dixit, ondare inmobiliarioan oinarrituta dagoela. Ileapaindegiko aldizkariak irakurtzea baino ez da egin behar hortaz jabetzeko.
Ondare inmobiliarioa, kasu gehiegitan, higiezinak erosi eta garestiago saltzetik sortzen da. Edota oinordetzan jaso eta modu intentsiboan ustiatzetik. Alokairu putreak, alokairu intentsiboak, alokairu neurrigabeak. Adreilu bat, eskrupulu gutxi eta dirua egiteko grina oinordetzan jaso baduzu, ez ei da zailegia dirudun egitea, ez da eliteko unibertsitate bateko master lutze bat behar. Hori guztia ileapaindegiko bibliaren arabera.
Aldizkariko ilehori distiratsu enpresariek ez dute zerbitzurik ematen, ez dute jakintza banatzen, ez dute produkturik eskaintzen, ez diete langileei lana eskaintzen edo soldata duinak ordaintzen. Etxebizitzen ustiaketa da beraien negozioa. Etxebizitza bizitzeko ordaindu behar dutenak dira atzeraldiko ilehoria nola egin ikasi beharrean daudenak.