Urtea amaitzen ari da eta enpresa guztiak BEZaren aitorpenarekin zoratzen ari diren bitartean, deskuidatu ezin daitekeen beste kontu bat ere bada: hornitzaile, bezero eta abarrei urte bukaera zoriontsua opatzea. Mundu hiperkonektatu honetan unean unekoa egin behar da desagertu nahi ez izanez gero eta, ondorioz, enpresa guztiei dagokie urte amaieran gabonak, urte amaiera edo batek daki zer ospatzen ari direla jakinaratzea.
EnpresaBIDEAren webgunera sartu naiz, eta gabonetako saskiaren zozketaz gain, ez dut gabon kutsu handirik sumatu. Hala ere, laguntzeko prest nagoenez, nahibeste erabiltzeko moduan utziko dizkiet ondokoak. Eta berrerabili nahi ezean, bitez bederen adimen artifizialaren ahalmenari eta kostuari buruzko gogoeta egiteko aitzakia.
Hasteko, EnpresaBIDEAk jarraitzaileei gabon zoriontsuak opatzeko postala behar du. ChatGPTk duela gutxi txertatu zuen irudiak sortzeko tresna (DALL-En oinarrituta) eta probatu nahi izan dut. Agindua hau izan da: “Sortu irudia: Olentzero EnpresaBIDEAko bulegora sartzen.”. Eta erantzuna, aldiz, behekoa:
Argi dago ezin dela Olentzeroren izen ona OpenAIren eskuetan utzi, eta ondorioz, eskaera bera egin diot Bing-i. Hona hemen emaitza:
Besterik ez bada ere, EnpresaBIDEAko langileak ipotx bezala irudikatzeak ezin uka irudiari gabonetako kutsu are handiagoa gehitzen diola, ezta? Hizkuntza eredu handiek eta, are gehiago adimen artifizialeko produktu komertzialek, arazoak izan ohi dituzte euskal kultura maneiatzeko. Hizkuntzarekin gertatzen den bezala, mainstreama, askotan ikusitakoa, askoz hobeto interpretatzen dute.
Gabonetako postaletako testuak ez dira bereziki interesgarriak izaten, baina ez da ona postala hutsik bidaltzea. ChatGPTk ondoko mezua prestatu du, “Enpresabidea ekonomiari buruzko egunkariak jarraitzaileei gabonetako zorion postal bat bidali nahi die. Idatzi gabonak zoriontzeko mezu labur bat postal batean jartzeko.” aginduari jarraituta:
Ataza arruntagoa izanagatik, kalitatearen hobekuntza nabarmena ikus daiteke. Euskaraz zuzen sortu du testua eta “EnpresaBIDEA” tipografia ere hobetu du.
Sare sozialetarako edukia ere sortu behar da gabon partean. Desatranques Jaénen garaian eskuz egin behar zena, orain klik pare batek lortzen du. Sunori eskatu diot EnpresaBIDEAri buruzko gabon kanta eta hau da sortu didana, “Enpresabidea ekonomiari buruzko egunkari bat da. Egin Enpresabideari buruzko gabon kanta bat.” eskatu ondoren.
Adimen artifizialaren kostu ekonomikoa
Errepika itsaskorra du gabon kantak, ezin uka. Dena den, ariketatxo hau adimen artifizialaren kostuaz gogoeta egiteko baliatu nahiko nuke. GPTren azken bertsioak entrenatzearen kostua ez da inoiz publiko egin, baina milaka milioi dolar inbertitu direla susma daiteke. Adimen artifizialerako hardwarea oso garestia da. Kontuan izan behar da prozesamendurako milaka GPU behar direla eta GPUrik ahalmentsuenak 30.000 dolar ingurukoak direla. Halaber, datu kantitate erraldoiak gordetzeko biltegiak, hozte-sistemak, elektrizitatea eta azpiegitura osoa bera ere kontuan hartu behar dira. Oinarrizko ereduak sortu dituzten ikertzaileei eta beste hainbat langileri ere soldata ordaindu behar zaie, noski.
Enpresa arrunt batek ez du adimen artifizialeko eredu handi bat zerotik entrenatzeko gaitasunik, baina horrek ez du esan nahi inoiz erabili ezingo dituenik. Artikulu honetarako sortutako baliabideak doan eskuratu ditut, esaterako. Hala ere, aginduak banan-banan sortzea ere ez da enpresa batean lan egiteko modurik egokiena. Batetik, ordainpeko sistema hobeak erabili daitezkeelako enpresa batek merezi duen kalitatea lortzeko eta, bestetik, txat formatuan ezin daitekeelako prozesua automatizatu.
ChatGPTren prezio politika arakatu dut enpresa batek esperimentu txikiak egiten hasteko zenbateko inbertsioa egin beharko lukeen aztertzeko. Bi kontzeptu izan behar dira kontuan ordainketa ulertzeko: sarrera-tokenak edo agindu bezala ematen zaizkion hitzak, eta irteera-tokenak edo sortzen duen testua. GPT-4o ereduak (orain arteko onena) milioi bat sarrera-token 2,5 dolarren (edo gutxiagoren) truke prozesatzen ditu. Milioi bat irteera-token 5 dolarrean ematen du. Jakinda token bat 0,75 hitz direla eta postala idazteko aginduak 21 hitz dituela (prozedura asko sinplifikatuz), 36.000 agindu egin genitzake 2,5 dolarren truke. Postaleko mezua ekoiztea, bestalde, 0,00017 dolar litzateke, 25 hitz dituenez.
Gabonetako iruditeria sortzea ez da adimen artifizialaren kostua kalkulatzeko adibiderik onena, gabonak urtean behin baino ez direlako eta ataza bereziki interesgarria ez delako. Agerian utzi nahi nuen, aldiz, norberaren enpresaren datuak prozesatzeak ez duela zertan garestia izan eta ez dela ezta konputazioan trebeena izan behar ere.