Hogeita piku eta berrogeita hamar asko urte arteko hirurogeitik gora emakume elkartu dira bizi naizen herrian bost asteburutan zehar mendian korrika egiteko. Herrian egiten den San Silbestre traila izan da aitzakia. Lasterketan parte hartzen zutenen ehuneko handiena gizonak zirela ikusita, emakumeen parte hartzea sustatze aldera, udalaren ekimenez, herriko trail taldearen laguntzarekin, bost irteera antolatu zituzten San Silbestrea prestatzeko.
Antolaketa, oso xumea eta aldi berean oso eraginkorra: deialdia zabaldu sare sozialetan, elkartzeko leku eta ordu bat jarri taldea abiatzeko, datorrena datorrela, eta hiru monitore taldea gidatzeko. Bi baldintza: emakumea izatea eta erritmo guztietara egokitzea. Hiru gidariak taldearen barruan ondo banatuta: aurrean bat, erdian bigarrena, azkena doan parte hartzailearen ondoan hirugarrena. Helburua taldean joatea eta inor ez bakarrik geratzea. Ibilbideko puntu jakin batzuetan geratu, taldea batzeko berriro abiatu aurretik. Aurrekontua: gidariak musutruk, parte hartzaileak doan. Ondorioa, hirurogeitik gora emakume, adin eta gaitasun desberdinetakoak, herri inguruko mendietan trail egiten, San Silbestre lasterketan emakume mordo bat izena emanda eta lasterketaren antolaketan laguntzeko ere emakume gehiago gertu.
Hasieratik nagusitasuna ez duten pertsonak edozein gizarteko, ekonomiazko edo produziozko ekimenetan parte hartu dezatela ez da berez sortzen den zerbait; sustatu egin behar da. Nagusitasuna ez dutenak izan daitezke emakumeak zenbait arlotan, gizonak beste arlo batzuetan (zaintza jarduerak kasu), izan daitezke gaitasun desberdineko pertsonak, inguru sozioekonomiko ahula daukatenak, edo izan daiteke hizkuntza gutxitu bat, jarduera jakin bat edo lurralde ahaztuago bat. Inertziari edo merkatuaren legeari baino kasu egiten ez bazaio, indar handiagoa dutenak izango dira beti irabazle, izan beti egin delako horrela, izan ohituragatik edo beste edozein arrazoirengatik.
Aldiz, ingurune seguruak antolatzen badira nagusitasuna ez dutenek ere parte har dezaten, erantzuna sekulakoa da, eta emaitza, nabarmena.
Bergarako trail neska taldearen ekimenak erakusten du askotan ez dela beharrezkoa antolaketa konplexurik, ez aurrekontu handirik, ez demaseko proiekturik. Batzuetan nahikoa da ideia bat, bultzatzaile bat, sinisten duen jendea eta bidelagun egokiak gutxiengoan daudenen partaidetzarako gune seguruak sortzeko. Emaitzak gurean, San Silbestre eguneko traila eta hortik aurrera sortutako emakume korrikalari sareak.