Adiskidetasunaz hausnartzen du Marina Garces filosofoak kaleratutako “La pasión de los extraños” azken liburu gomendagarrian. Zergatik daude adiskideak pertsonon bizitzan? Adiskidetasuna, dio, giza harreman iraunkor bakarra da erakunde bat asmatu ez dioguna. Ez dago adiskidetasunaren erregistrorik, ez da izenik ematen, ez da kontraturik sinatzen. Bizi ahal gara senideez inguratuta edo ondo konpontzen garen lankideez inguratuta, baina hala ere lagunak jartzen ditugu gure bizitzan. Senidetasunetik eta lanetik adiskidetasuna atera daiteke, nahiz eta ez doazen lotuta halabeharrez.
Rokodromoan neskei eskaladaren hastapena azaltzen ari den irakasleak eskaladaren baloreaz diharduela, konfiantza aipatzen du balore garrantzitsuaren artean. Eskaladan ezinbestekoa da soka-lagunarengan erabateko konfiantza izatea, konfiantza falta denean arriskua sor daiteke. Eta irakasleak neskei azaldu die konfiantza sumatzen ez badute, zein inportantea den “ez” esatea.
Lagunen artean lan munduan jarrera matxistarik jasan ote dugun eztabaidatzen dihardugu. Ageriko jarrera matxista orokor nabarmenik jasan izanaz ez gara jabetzen. Mikroagora jotzerakoan zalantza gehiago sortzen zaizkigu ordea: jendaurreko bronka bidegabeak gizonek agian ez dituztenak jasan; gure ahotsa batzar eta bileratan ez entzutea, hain nabarmen, ezen, ez da kontutan hartzen emakumeak egindako ekarpena lankide gizon batek ekarpen hori bera egin eta txalotzen den arte; lankide gizon batek zure ideia edo ekarpen jenial bat berekotzat hartzea eta beragatik zoriondua izatea; itxuraren arabera epaituak sentitzea; egiteko batzuk eskatzen ote zaizkigun gizonei sekula eskatzen ez zaizkienak.
Lan harremanetatik sor daitezke adiskideak, baina, izan gaitezen errealista, lan munduko lankide, bezero, negozio-kide edo edozein motatako solaskideek ez daukate zertan zure lagun bilakatu behar. Ostera, lan munduan moldatzeko eta ibiltzeko bai da garrantzitsua ondoan daukazun kide horretan konfiantza izatea, soka-lagunaren konfiantza bera, eta konfiantzarik ezean, ezetz esaten jakitea inolako drama barik. Ez, nik aipatu dut lehenago irtenbide hori; ez, ez dut zurekin negoziorik egin nahi; ez, aipatzen duzun komentario hori lekuz kanpo dago; ez, nik azaldu nizun orain zurea izango balitz bezala adierazten diharduzun proiektu hori; ez, ezin didazu kargu hartu nire begiratzeko modua gustatu ez zaizulako. Guztiak adibide errealak. Lehenago apuntatu behar izan genuen eskaladako ikastarora.