Aztiko udako ikastaroak Europako Batzordearen MakeEUBlue Award saria jaso du, itsas iraunkortasunari egindako ekarpena aitortuz. Zentro teknologikoak ohar bidez azaldu duenez, ozeanoen garrantziari buruz herritarrak kontzientziatzeko eta hobeto ulertzeko egin duen lanak jaso du aintzatespen hori. Era berean, Aztik itsas jasangarritasuna sustatzeko duen konpromisoa eta "itsasoan eta kostaldean kalitatezko hezkuntza" emateko duen dedikazioa azpimarratzen ditu errekonozimenduak.
Aztiren arabera, bere hezkuntza-programaren "ikuspegi berritzaileari" esker eta ikasleak eta profesionalak "inspiratzeko" gaitasunari esker lortu da, "itsas zientzian eta politikan liderren belaunaldi berri bat" sustatuz.
Ekainaren 11tik 13ra bitartean, Donostiako Aquariuma izango da Aztiren udako ikastaroaren 2024ko edizio berriaren eszenatokia. Bertan, nazioarteko hainbat hizlarik parte hartuko dute, eta gai kritikoak jorratuko dituzte, hala nola zientziako komunikazio eraginkorra, ikerketaren integrazioa erabaki politikoak hartzerakoan eta itsas baliabideen kudeaketa iraunkorraren sustapena.